El xuez Ismael Moreno alcordó la so mientada depués de que-y lo pidier la Fiscalía Anticorrución sofitándose en que tanto elli como los tamién investigaos Michaux Miranda -es direutor xeneral de xestión de presones d'ADIF- y Álvaro Sánchez Manzanares -es secretariu xeneral de Puertos del Estáu- "podrín exercer ciertes presiones so les presones responsables de los entes que tenín de facer l'axudicación de los contratos de suministru de mázcaros", sigún un enforme de la Unidá Central Operativa (UCO) de la Guardia Civil.
El fiscal, nel so pidimientu, esplicaba que estes presiones asocedienon "ensin dexar que podieren esaminase otres ufiertes o presupuestos, dando por fecho y ensin denguna oución d'arrebater la decisión final d'axudicación, que l'axudicatariu final diba ser Soluciones de Xestión".
"Al entamu, ensin perxuiciu d'ultierores considerances, tala conduta podría cuacar dientro del contornu del delitu de tráfigu d'enfluencies. Poro, col envís de garantir la plena efetividá del derechu a la defensa y quitar de que puedan aportar contra ellos situaciones materiales d'indefensión, considérase procedente que se ha de proceder a la so toma declaración en calidá d'investigaos", amestaba Anticorrución.
Nel enforme de la Guardia Civil destacábase amás el "venceyamientu direutu" del es susecretariu de Tresportes José Manuel Gómez, l'esmenistru José Luis Ábalos y'l so esasesor Koldo García.
Sostenía que la Susecretaría del Menisteriu, en manes de Gómez, asumió un rol clave en que la decisión d'axudicar a Soluciones de Xestión fora tresmitía a los entes qu'executanon la contratación.
Sigún endicaben los investigadores, nel marcu del procedimientu alcontránonse correos lletrónicos nos que paez exercera como "correa de tresmisión ente la esfera próxima del menistru y los entes axudicadores".
Los axentes fain finca en que Gómez declaró a los investigadores nun participar na axudicación na axudicación de los contratos a Soluciones de Xestión per parte de Puertos del Estáu y ADIF, una afirmación que la UCO considera que ta "lloñe de la rialidá" depués d'analizar los correos lletrónicos.
El cese de Gómez
Gómez fo cesáu del so cargu pol atual menistru de Tresportes, Óscar Puentes, depués de que se fixere pública l'auditoría enterna que s'encargó nel departamentu y teniendo presente amás que costaba como imputáu na causa.
Puente aseveró que de los fechos y conclusiones que s'estrayen de l'auditoría enterna fecha pol so menisteriu "produzse una perda d'enfotu que acaba na decisión"
Cabe recordar que nesti procedimientu que s'estrui nel Xulgáu Central d'Estrución Númberu 2 de l'Audencia Nacional tan baxo'l llente ocho contratos axudicaos por destintos entes de l'Alministración Pública con un emporte global de 51.998.434 euros.
El xuez investiga a Koldo García y otres presones pola presunta trama que pagaría comisiones pa llograr axudicaciones pa la venta de mázcares na pandemia. La Fiscalía Anticorrución atribui-yos presuntos delitos d'organización criminal, blanquéu de capitales, cofechu, delitos contra la Hacienda Pública y tráfigu d'enfluencies.
Publicar un comentario