Trabayos de busca y rescate tres un bombardéu del Exércitu d'Israel contra la capital de Líbano, Beirut
La Defensa Civil libanesa cifra en 66 los mancaos del ataque, que dexa más de 10 desapaecíos ente la murueca.
El balance de vítimes mortales por mor del bombardéu executáu'l vienres pol Exércitu d'Israel contra'l sur de la capital de Líbano, Beirut, xubió a 50, sigún confirmanon esti domingu los equipos de rescate, que afirmanon que los trabayos de busca y rescate siguen na zona.
La Defensa Civil de Líbano endicó que, amás de los 50 finaos, l'ataque causó 66 mancaos, mentes que otres once presones siguen desapaecíes, polo que se tarrez que la cifra de muertos xuba nes próximes hores, sigún recoyó'l diariu libanés "L'Orient-Le Jour".
Hores enantes, el Centru d'Opreraciones d'Emerxencia del Menisteriu de Sanidá libanés endicare que los equipos de rescate afayaren 45 calabres nel sitiu bombardiáu y amestó que se sigue quitando murueca na zona, tal como enformó l'axencia estatal libanesa de noticies, NNA.
Les autoridaes libaneses especificanon el sábadu qu'ente los muertos había a lo menos trés neños, al tiempu que cifró en cerca de 40 los muertos, ente ellos Ibrahim Akil, un altu cargu del prencipal organismu militar del partíu-milicia chií Hezbolá que fo identificáu por Israel como oxetivu del bombardéu.
Akil taba'n xunta con altos mandos de la Forcia Raduán baxo un edificiu residencial d'un barriu nel sur de Beirut cuando asocedió l'ataque, nel que, sigún la versión israelí, morrienon otros 15 comandantes de Hezbolá, encluyíu Ahmed Wahbi, responsanble d'entrenamientu del grupu.
El bombardéu asocedió díes depués d'una folada d'esplosiones coordinaes en despositivos de comunicación supuestamente por Hezbolá, que dexó alrodiu de 40 muertos y unos 3.000 mancaos. Gran parte de la comunidá internacional, encluyía Naciones Xuníes, amostró la so esmolición por esti socedíu polo indescriminao del ataque.
El repunte de los enfrentamientos ente Israel y Hezbolá -un grupu sofitáu por Itán que cunta con un emportante pesu militar y políticu en Líbano- fexo tarrecer cola posibilidá d'una espansión del conflitu n'Oriente Próximu. Nesti contestu, l'Exércitu d'Israel presentó la selmana pasada a Estaos Xuníos los sos "planes operativos" respeuto a Líbano.
Publicar un comentario